പരി.പുലിക്കോട്ടില്‍ മാര്‍ ദിവന്നാസിയോസ്:ഭാരത ക്രൈസ്തവ സഭയുടെ മഹാഗുരു.

കാലത്തിനു മുന്‍പേ സഞ്ചരിച്ച മനീഷീ.ബൈബിള്‍ മലയാളത്തിലേക്കു പരിഭാഷപ്പെടുത്തി അച്ചടിക്കുക, ഇംഗ്ലിഷ് വിദ്യാഭ്യാസത്തിനും സ്ത്രീവിദ്യാഭ്യാസത്തിനുമായി പഠിത്തവീട് തുറക്കുക, ചിതറിക്കിടക്കുന്ന വിശ്വാസസമൂഹത്തിനു ഭരണക്രമവും ചട്ടങ്ങളും ആവിഷ്‌കരിക്കുക, വൈദിക പരിശീലനകേന്ദ്രവും സഭാഭരണകേന്ദ്രവും സ്ഥാപിക്കുക. ഒരു പുരുഷായുസ്സില്‍ ചെയ്തുതീര്‍ക്കാന്‍ കഴിയുന്ന കാര്യങ്ങളാണ് ഇവയെന്ന് ഇന്നുപോലും വിശ്വസിക്കാന്‍ പ്രയാസം. എന്നാല്‍, ഇതും ഇതിലപ്പുറവും രണ്ടു നൂറ്റാണ്ടിനു മുന്‍പു ചെയ്തുതീര്‍ത്ത മഹാമനീഷിയാണ് മലങ്കരസഭയുടെ സഭാജ്യോതിസ് പുലിക്കോട്ടില്‍ ജോസഫ് മാര്‍ ദിവന്നാസിയോസ്. പാരമ്പര്യവാഴ്ചയ്ക്ക് അന്ത്യം കുറിച്ചുകൊണ്ടു മലങ്കരസഭയുടെ നേതൃസ്ഥാനത്ത് ആദ്യമായെത്തിയ അദ്ദേഹത്തിന്റെ ചരമ ദ്വിശതാബ്ദി ആഘോഷങ്ങളുടെ ആഗോള സമാപനത്തിനു വേദിയാവുകയാണു ജന്മനാടായ കുന്നംകുളം ഇന്ന്. പുലിക്കോട്ടില്‍ ചുമ്മാര്‍, എളിച്ചി ദമ്പതികളുടെ സീമന്തപുത്രനായി കുന്നംകുളത്തെ പാലൂര്‍-ചാട്ടുകുളങ്ങര (ആര്‍ത്താറ്റ്) ഇടവകയില്‍ 1740 നവംബര്‍ 25നു ജനിച്ച ഇട്ടൂപ്പ് മലയാളം, സംസ്‌കൃതം, സുറിയാനി, ഗണിതശാസ്ത്രം, തച്ചുശാസ്ത്രം എന്നിവയില്‍ പ്രാവീണ്യം നേടി. ആറാം മാര്‍ത്തോമ്മായില്‍നിന്നാണു വൈദികപട്ടം സ്വീകരിച്ചത്. ക്രിസ്തുമത പ്രചാരണത്തില്‍ ഉത്സുകനായിരുന്ന ക്ലോഡിയസ് ബുക്കാനന്‍ 1806ല്‍ ആറാം മാര്‍ത്തോമ്മായെ സന്ദര്‍ശിച്ചു ബൈബിള്‍ പരിഭാഷയ്ക്കു സഹായം തേടി. സുറിയാനി പണ്ഡിതരായ ഇട്ടൂപ്പ് അച്ചനെയും (പുലിക്കോട്ടില്‍ ജോസഫ് മാര്‍ ദിവന്നാസിയോസ്) കായംകുളം പീലിപ്പോസ് റമ്പാനെയും മാര്‍ത്തോമ്മാ പരിചയപ്പെടുത്തി. ഇവരോടൊപ്പം മലയാള പണ്ഡിതനായ തിമ്മയ്യാ പിള്ളയെയും നിയോഗിച്ചു. നാലു സുവിശേഷങ്ങള്‍ മലയാളത്തിലാക്കി ബോംബെയില്‍ കൊണ്ടുപോയി അച്ചടിച്ചു. വിദഗ്ധരെ ബോംബെയിലേക്ക് അയച്ചാണു പേജുകള്‍ തടിയില്‍ കൊത്തിയുണ്ടാക്കിയത്. 100 കോപ്പി അച്ചടിച്ച് എല്ലാ പള്ളികളിലും എത്തിച്ചു. ഈ പരിഭാഷയിലൂടെ സുവിശേഷ ആശയങ്ങള്‍ വിശ്വാസികള്‍ക്കു ഗ്രഹിക്കാനായതു കേരളത്തിന്റെ നവോത്ഥാനത്തിനു വഴിതുറക്കുകയായിരുന്നു. ഒട്ടേറെ പ്രശ്‌നങ്ങളെ സഭ അഭിമുഖീകരിച്ചിരുന്ന കാലമായിരുന്നു അത്. പാരമ്പര്യമായി കൈമാറിയിരുന്ന സഭാനേതൃത്വത്തിന്റെ പൗരോഹിത്യസാധുത തന്നെ ചോദ്യം ചെയ്യപ്പെട്ടിരുന്നു. വൈദേശിക ശക്തികള്‍ സഭയില്‍ അധീശത്വം സ്ഥാപിക്കാന്‍ നടത്തിയിരുന്ന ശ്രമങ്ങള്‍ വേറെ. പ്രതിസന്ധികളെ അതിജീവിക്കാന്‍ പാടുപെടുകയായിരുന്നു സഭ അന്ന്. ഇട്ടൂപ്പ് അച്ചന്റെ ഇടവകയായ പാലൂര്‍-ചാട്ടുകുളങ്ങര (ആര്‍ത്താറ്റ്) പള്ളിയും ചാവക്കാട്ടെ ചാപ്പലും പൂട്ടിയിടേണ്ടിവന്നു. പള്ളി തുറന്നുകിട്ടാന്‍ നിരന്തരം രാജകുടുംബത്തെ സമീപിച്ചിരുന്ന ഇട്ടൂപ്പ് അച്ചന് ശക്തന്‍ തമ്പുരാനാണ് അനുവാദം നല്‍കിയത്. ആര്‍ത്താറ്റ് പള്ളി ഉചിതമായ പ്രൗഢിയോടെ പുനര്‍നിര്‍മിച്ചതും ഇട്ടൂപ്പ് അച്ചനാണ്.കൂനന്‍കുരിശു സത്യത്തിലൂടെ ചരിത്രത്തിന്റെ ഗതി തിരിച്ചുവിട്ട മലങ്കര സഭയില്‍ അടുത്ത നാഴികക്കല്ലായി മാറിയ ആര്‍ത്താറ്റ് പടിയോലയുടെ (1806) മുഖ്യശില്‍പി ഇട്ടൂപ്പ് അച്ചനായിരുന്നു. സകല വൈദേശിക മേല്‍ക്കോയ്മകളെയും നിരാകരിച്ചു മാര്‍ത്തോമ്മാ ശ്ലീഹായുടെ പൈതൃകത്തിലേക്കു സഭയെ തിരിച്ചെത്തിക്കുമെന്നു വ്യക്തമാക്കിയ ആര്‍ത്താറ്റ് പടിയോല സഭയുടെ മാഗ്‌നാകാര്‍ട്ടയായി. കായംകുളം പീലിപ്പോസ് റമ്പാനും ഇട്ടൂപ്പ് മല്‍പാനും പ്രധാന ശില്‍പികളായ കണ്ടനാട് പടിയോല (1809) സഭയിലെ ആരാധനാ പാരമ്പര്യങ്ങളും ആചാരങ്ങളും ഭരണരീതികളും ഏകീകരിക്കാനുള്ള തുടര്‍ശ്രമമായിരുന്നു. 1809ലെ കണ്ടനാട് പള്ളി പ്രതിപുരുഷ യോഗത്തിന്റെ തീരുമാനപ്രകാരം അക്കൊല്ലം കന്നി എട്ടിന് ഇട്ടൂപ്പ് അച്ചന്‍ ആര്‍ത്താറ്റ് പള്ളിയില്‍ എട്ടാം മാര്‍ത്തോമ്മായില്‍നിന്നു റമ്പാന്‍പട്ടം സ്വീകരിച്ചു. കണ്ടനാട് പടിയോലയില്‍ വിഭാവനം ചെയ്ത രണ്ടു പഠിത്തവീടുകള്‍ കായംകുളം പീലിപ്പോസ് റമ്പാന്റെയും ഇട്ടൂപ്പ് മല്‍പാന്റെയും നേതൃത്വത്തില്‍ സ്ഥാപിക്കാനായിരുന്നു ഉദ്ദേശ്യമെങ്കിലും പീലിപ്പോസ് റമ്പാന്‍ 1811ല്‍ മരണമടഞ്ഞതോടെ അത് ഒന്നായി ചുരുക്കി. തിരുവിതാംകൂറിന്റെയും കൊച്ചിയുടെയും മധ്യഭാഗത്തുള്ള കോട്ടയത്തു പഠിത്തവീടിനു സ്ഥലം അനുവദിക്കാന്‍ തിരുവിതാംകൂര്‍ റാണിയോട് അദ്ദേഹം അഭ്യര്‍ഥിച്ചു. ഇട്ടൂപ്പ് റമ്പാനുമായി അടുപ്പം പുലര്‍ത്തിയിരുന്ന കേണല്‍ മണ്‍റോയുടെ ശുപാര്‍ശപ്രകാരം കോട്ടയത്ത് മീനച്ചിലാറിന്റെ തീരത്ത് കരമൊഴിവായി അനുവദിച്ച സ്ഥലത്ത് അദ്ദേഹം സെമിനാരി നിര്‍മിക്കാന്‍ ശ്രമം തുടങ്ങി. വട്ടിപ്പണത്തിന്റെ പലിശ കുടിശിക കേണല്‍ മണ്‍റോയുടെ ശുപാര്‍ശപ്രകാരം ഇട്ടൂപ്പ് റമ്പാനു ലഭിച്ചു. 1815ല്‍ നിര്‍മാണം ഏതാണ്ടു പൂര്‍ത്തീകരിച്ചു വൈദികപരിശീലനം ആരംഭിക്കുകയും ചെയ്തു. ഒപ്പം മറ്റുള്ളവര്‍ക്ക് ഇംഗ്ലിഷ് പരിശീലനവും. പെണ്‍കുട്ടികള്‍ക്കും അവിടെ പഠനസൗകര്യം ഏര്‍പ്പെടുത്തി സ്ത്രീവിദ്യാഭ്യാസത്തിനും തുടക്കമിട്ടു. സഭയുടെ തിലകക്കുറിയായി ഇന്നും തുടരുന്ന പഴയ സെമിനാരിയുടെ ആരംഭം ഇങ്ങനെയായിരുന്നു. വട്ടിപ്പണപ്പലിശ മെത്രാനു നല്‍കണമെന്ന വ്യവസ്ഥ നിലനില്‍ക്കെ അതു റമ്പാനു കൈമാറിയതിനെതിരെ പരാതി ഉണ്ടായപ്പോള്‍ ആ കുടുക്കില്‍നിന്നു രക്ഷപ്പെടാന്‍ കേണല്‍ മണ്‍റോ ഉള്‍പ്പെടെ ഒട്ടേറെ പേര്‍ ഇട്ടൂപ്പ് റമ്പാനെ മെത്രാന്‍സ്ഥാനം ഏല്‍ക്കാന്‍ നിര്‍ബന്ധിച്ചു. വൈമനസ്യത്തോടെ അതിനു വഴങ്ങി പഴഞ്ഞി പള്ളിയില്‍ 1815 മാര്‍ച്ചില്‍ 75-ാം വയസ്സില്‍ ഇട്ടൂപ്പ് റമ്പാന്‍ തൊഴിയൂരിന്റെ കിടങ്ങന്‍ ഗീവര്‍ഗീസ് മാര്‍ പീലക്‌സിനോസില്‍നിന്നു ജോസഫ് മാര്‍ ദിവന്നാസിയോസ് എന്ന പേരില്‍ മെത്രാപ്പൊലീത്തയായി സ്ഥാനമേറ്റു. 1653 മുതല്‍ നിലനിന്നിരുന്ന പാരമ്പര്യ മെത്രാന്‍വാഴ്ച അതോടെ അവസാനിച്ചു. അദ്ദേഹം മലങ്കര മെത്രാപ്പൊലീത്തയുടെ ആസ്ഥാനമാക്കിയ പഴയ സെമിനാരി പിന്നീടു ദേവലോകം അരമന സ്ഥാപിക്കുന്നതു വരെ ഒന്നര നൂറ്റാണ്ടോളം ആസ്ഥാനമന്ദിരമായി തുടര്‍ന്നു. ജീവിതകാലം മുതല്‍ പ്രകാശഗോപുരമായി സഭയ്ക്കു വഴികാട്ടിയ ആ സഭാജ്യോതിസ് 1816 നവംബര്‍ 24നു പഴയ സെമിനാരിയില്‍ കാലംചെയ്തു.

Comments

comments

Share This Post

Post Comment